إلي زعيم العائله العفاريتيه مرجان.. لو كنت عفريته لفعلت أشياء كثيرة جدا ولكن لماذا لو كنت؟! فأنا منذ صغري عفريته هكذا يقول لي أبي دائما..
و الآن كل من يعرفني يقول إني عفريته كبيييييرة آوى..
سلامو عليكو يامرموري، طبعا مستغرب أصلا إني بسلم عليك.. بس عادي أصل أنا بحب الرخامة وعايزه أغلس عليك..
المهم عامل ايه مع مرجانه؟ أكيد مطلعة عينك بس برضه هي قارورة حلوة كدا فعلي الله تزعلها!! دي لازم تحطها في عنيك..
ياتري بقا ايه الأخبار عندكو ياتري زحمه زي عندنا والجو اتلوث بردو والميه كلها سموم عشان مخلوطه بالصرف الصحي، والقتال والسرقة زادوا حتى من القريبين..!!
والعفاريت الصغيرين حلوين مع بعضهم ولا بيتخانئو ويضربو بعض زينا وأخبار الدروس الخصوصية والمدرسين مطلعين عنيكو زينا، حقيقي مبقاش كتير زي الأول بعد انتشار فيروس كورونا بس برضه.. طبع أغلب الناس زي ما هو استنزاف طاقات و استغلال..
بس عندي سؤال محيرني هي الناس بقت تتحرش تغتصب دون اعتراف أو أي حاجه.. إوعى تكونوا أنتم السبب.. ؟!
أظن كفايه لحد كده ده أنا أكيد تعبت قلبك ونخش بقا في الموضوع المهم اللي أنا كنت عايزاك فيه.. أصل أنا فكرت كتيييييير أوي وكنت عايزه أطلب شوية طلبات..
أولا هبعتك يامرجان ياحبيبي تجيب لي عمو السيسي من تحت طقاطيق الأرض بمجرد أني أغمض عيني وأفتحها ألاقيه قدامي هقوله حضرتك بتعمل مشاريع كتيرة آوى وعايز ترجع القاهرة زي ما كانت من سنين كباريس للشرق ويمكن آكتر وتكون عاصمة الألف كوبري “مين عارف” أهي كلها أحلام وأماني..
بس ممكن تخلي بالك مننا، تشجعنا، يكون في جوايز كتير للإبداع ودعم الشباب حتى لو بأفكار بسيطة وصغننه، أحيانا يا عمو بيكون الاهتمام بالجانب الإنساني أقوى بكتير من البنايات وإعادة الهيكلة..
زيادة المرتبات والاجور للموظفين هدف ضروري، رفع كفاءة الأفراد العلمية والثقافية وخاصة الفئة العاملة، كلٌ على حد سواء..
طبعا يا عمو إحنا عارفين إنك بتحول تطر المنظمة الصحية بس برضه لسه في خلل معين، مجرد ما نحط أيدينا عليه ونحارب الفساد و الشائعات بأيد واحدة من حديد بلدنا هتتغير خااالص..
يا مسهل، كلنا مستنين وايدينا مش على خدنا آوى شويه كدا وشويه معاك، عشان إحنا صغننين برضه.. ولا حضرتك شايف إيه ؟؟
وبعد كدا هقولك يا مرموري ترجع عمو السيسي زي ما هو ويباشر أعماله براحته طالما هيحاول يخلينا إحنا الأساس..
ثانيا يا سلام بقى لو تشهرني آكتر وتعرفني على دور نشر كتييير وكلهم يدوروا عليا عشان يشتغلوا معايا.. أصل أنا متواضعة آوى يا مرموري..
ثالثا ياريت لو كل شاب يتحط في مكانه صح والشطار إللي زي حالاتي طبعا ياخدوا حقهم أو على الاقل بتعرفوا..
رابعا ودا الاهم حتى أهم مني شخصيا الولاد أو الشباب إللي مش لاقين شغل يتوفر لهم شغل قبل البنات لأن هما إللي بيصرفوا على البيت، هما أولياء الأمور، هما السند والدعم والقوة فبلاش نضعفهم و نوجع قلوبهم..
اخر حاجه بقا أنا هدعى ربنا يسامحنى اذا كنت غلط فى حق حد ولا جبت سيرة حد كده ولا كده بدون قصد طبعا انتو عارفينى كويس غلباااااانه خاااااااالص..
ويالا بقا أقولكو سلااااااام واقابلكوا المرة الجايه مع عفارييت تانييييين
باى باااااااااااااى..
أسماء عبد الخالق
