يعنى قبل الفطار زيطة وكله بيتكلم
وفاتحين قناة المصرية عشان مستنين الآذان في القاهرة واللي بنفرق عنه دقايق
وناس تجيب الاطباق وناس تجيب كوبايات العصير وناس تجيب المعالق والشوك والسكاكين
والبنات الكبيرة واقفة ف المطبخ بتغرف وتناول الصغيرين عشان يوصلوه لبرة
ولازم تقوله جملة من اتنين:
اوعى يقع يتكب منك
ولو حاجة سخنة حاسب لاتتلسع
وكل رجالة العيلة قاعدين في الصالون وبيتكلموا في السياسة
وفي آخر ماتش للاهلى وفي احوال البلد والاسعار وآخر الاخبار
عارف يعنى ايه الحــــب فى رمضـــــان ؟
يعنى اما تشوف ابن خالتك الصغير ماسك بطنه وعمال يسأل كل خمس دقايق هو المغرب لسه ما أذنش . فانت تقوله خلاص قرب خالص وتقعد ترفع من روحه المعنوية وتقوله جدع ان انت صايم معانا برافووو عليك . كبرت كدة وبقيت تصوم زينا اهو
فتلاقي ايده نزلت م ع بطنه وقالك طبعاااااااا انا كبرت زيكو
واول ما المغرب يأذن تلاقي الاطفال الصغيرين ماسكين البلح وبيلفوا علي كل اللي في الشقة وبيوزعوه بسرعة وبيتخانقوا علي ثواب افطار صائم
فتلاقي حد فيهم منكمش كدة وجاى في الآخر يائس خالص وبيقولك هاه حد اداك بلحة تفطر ولا لسه؟
كلهم ادوهم وانا ما اديتش حد ؟؟
فتروح تقوله دة انت نجدتنى دول نسونى ومحدش جابلي غيرك انت
فتترسم علي وشه ابتسامة حلوة انه لحق يفطر حد وياخد الثواب
وانت بينك وبين نفسك دى خامس بلحة تاكلها
عارف يعنى ايه الحــــب فى رمضـــــان ؟
يعنى ترابيزة سفرة طويلة ف بيت العيلة الكبير
والعيال الصغيرة قاعدين جنب بعضيهم فنهاية الترابيزة
وفى نهاية الطرف التانى جدو قاعد وجدة ع يمينه وبعدين خالو ومراته وخالتو وجوزها وباقي العيلة بقي
وانت قاعد فى النــص
بتبص عليك وانت صغير زمان اما كنت بتقعد ف آخر الترابيزة زى العيال الصغيرة دول
وبتبص عليك وانت كبير في المستقبل اما هتقعد علي اول الترابيز ف يوم ما وحواليك عيلتك ال هتكونها بكرة
الجو الدافى ال مش بنحسه اوى اوى غير ف رمضان وبس
معنى الحب في اللمة وانك تشوف عيلتك واللى بتحبهم كلهم متجمعين حواليك
عرفت يعنى ايه معنى الحب ف رمضاان ؟
وكل سنة وانتم طيبين
